Në sallën e Kuvendit Komunal u mbajt tryezë diskutimi me rastin e shënimit të 2 – Prillit “Ditës Ndërkombëtare të Autizmit”
Sektori për të Drejtat e Njeriut dhe Komunitete në kuadër të Drejtorisë për Administratë Komunale në bashkëpunim me Drejtorinë e Arsimit me rastin e shënimit të 2 – Prillit “Dita Ndërkombëtare e Autizmit”, ka mbajtur një tryezë diskutimi me përfaqësues nga shkolla (drejtorë, psikologë, pedagog, asistentë të fëmijëve më aftësi të kufizuara, mësues mbështetës), zyrtarë komunal, përfaqësues nga OJQ, përfaqësues nga Qendra për Punë Sociale dhe prindër të fëmijëve me autizëm.
I pranishëm në këtë takim ishte edhe Kryetari i Komunës Ilir Ferati i cili me një fjalë rasti tha se: “Kjo ditë, duhet të na shërbejë që bashkërisht të angazhohemi dhe të punojmë më shumë për mbrojtjen, promovimin e të drejtave të njeriut e sidomos fëmijëve me nevoja të veçanta.
Për këto dy vite qeverisje kemi arritur që të avancojmë në dy pikat e rëndësishme të programit tonë qeverisës për fëmijët e veçantë:
Ofrimi i asistentëve për fëmijët e veçantë në të gjitha shkollat, një asistent për çdo fëmijë.
Për fëmijët me nevoja të veçanta do të krijohen kushtet për integrimin e tyre në sistemin e rregullt shkollor duke mundësuar shërbime edukative shtesë dhe falas.”Qëllimi i kësaj tryezë ishte diskutimi i sfidave, vështirësive, nevojave dhe kërkesave që i kanë prindërit me rastet e fëmijëve të tyre përgjatë ofrimit të kujdesit si dhe profesionistët të cilët ofrojnë shërbime profesionale për fëmijët me autizëm.”
Në këtë tryezë nga të gjithë të pranishmit u theksua përgjegjësia e secilit prej nesh që kemi ndaj fëmijëve me autizëm dhe familjeve të tyre si dhe mbështetja e vazhdueshme institucionale që duhet të ju ofrohet me qëllim integrimi dhe ngritjes së vetëdijes në shoqëri.
Si qëllim tjetër ishte edhe ngritja e çështjeve të ndryshme në nivel të debatit institucional në mënyrë që për fëmijët me autizëm të sigurojmë shërbimet e nevojshme, të qëndrueshme e cilësore për zhvillim dhe një mirëqenie më të mirë për fëmijët dhe personat e rritur me autizëm.
