Këshilli Komunal për Siguri në Bashkësi (KKSB) ka mbajtur mbledhjen e rregullt mujore
Këshilli Komunal për Siguri në Bashkësi (KKSB) ka mbajtur mbledhjen e rregullt mujore në të cilën anëtarë të saj, Policia e Kosovës, FSK-ja, KFOR-i, Përfaqësues të Burgut të Dubravës, Shoqëria Civile si dhe përfaqësues të komuniteteve që jetojnë në komunën e Istogut, kanë vlerësuar situatën e sigurisë të qetë dhe stabile. Komandanti i Stacionit Policor në Istog Z. Xhevukaj ka prezantuar një raport të shkurtër rreth aktiviteteve që kanë karakterizuar periudhën në mes të dy mbledhjeve. “Gjatë një muaji në polici janë raportuar 76 raste, nga këto, 45 raste kanë të bëjnë me kryerje të veprave penale dhe 31 me kundërvajtje, 67 % të rasteve janë ndriçuar”, ka thënë z. Xhevukaj.
Obrad Tijaniq, përfaqësues i komunitetit serb, ka ngritur edhe një here rastin e incidenteve me të kthyerit serb në fshatin Zallq duke pyetur pse në asnjë nga lokacionet tjera në komunë ku jetojnë serbët nuk ka incidente përveç Zallqi. Komandanti i policisë për stacionin e Istogut, incidentet e përmendura i ka kualifikuar si incidente të izoluara dhe ka konstatuar se ato nuk janë të drejtuara për ta minuar procesin e kthimit e as kundër komunitetit serb, por kanë lidhshmëri me individ të caktuar të kthyer. “Policia është e pranishme në këtë pjesë plot 24 orë me qëllim që situatën ta kemi nën kontroll”, ka thënë Z. Xhevukaj.
KKSB-ja bisedoj edhe për çështjen e sigurisë së të rinjve që kalojnë orët e natës nëpër klube dhe diskoteka në mënyrë që rastet të cilat kanë ndodhur dhe po ndodhin me të rinjtë të parandalohen për aq sa është e mundur.
