Sot, Kryetari i Komunës së Istogut, z. Ilir F. Ferati, priti në një takim njohës Ambasadorin e Britanisë së Madhe në Kosovë, z. Jonathan Hargreaves.
Gjatë takimit u diskutua për prioritetet zhvillimore të komunës, projektet në vijim dhe mundësitë për thellim të bashkëpunimit në fusha me interes të ndërsjellë, me fokus të veçantë në qeverisjen e mirë dhe përfshirjen e qytetarëve në vendimmarrje.
Pas takimit, Kryetari Ferati dhe Ambasadori Hargreaves vizituan organizatën joqeveritare “Forca e Gruas” – një ndër organizatat më aktive dhe më përfaqësuese për gratë në komunën tonë. Gjatë vizitës, u theksua rëndësia e fuqizimit të rolit të gruas në shoqëri dhe mbështetja e vazhdueshme që institucionet lokale i japin kësaj kauze.
Në fund të vizitës, Kryetari Ferati falënderoi Ambasadorin Hargreaves për vizitën dhe për interesimin e treguar për zhvillimet në komunën tonë, ndërsa Ambasadori shprehu mirënjohje për mikpritjen dhe bashkëbisedimin e frytshëm me kryetarin dhe shoqërinë civile në Istog.
