Fjala ime në një vjetorin e shkruajes në amshim të Kryetarit shumëvjeçar të Istogut, nënkryetarit të LDK-së dhe veprimtarit të palodhshëm të kauzës tonë për liri, pavarësi e demokraci, Haki Rugova:
E nderuar familje Rugova,
I nderuar nënkryetar i LDK-së, Lutfi Haziri,
I nderuar ish-kryeministër, z.Avdullah Hoti,
Të nderuar anëtarë të kryesisë së LDK-së, deputetë, anëtarë të kuvendit komunal, përfaqësues të klerit fetar,
Të nderuar miq dhe bashkëpunëtorë të Haki Rugovës,
Të nderuar qytetarë, të Istogut e të Kosovës,
Zonja dhe zotërinj,
Në çdo dimër të ftohtë dhe të mbytshëm, ne shohim në mënyrë më të qartë sakrificën e popullit tonë për lirinë, pavarësinë dhe demokracinë. Sot, njëlloj si në çdo dimër tjetër, ne kujtojmë njerëzit që e ndjekën idealin e tyre, ne kujtojmë njerëzit e luftës dhe të pendës, të paqes dhe të demokracisë, që u ndanë nga ne fizikisht, por që e kanë lënë trashëgiminë e tyre të madhe në jetën tonë. Vepra e tyre nuk mund të zbutet nga ftohtësia e dimrit – ajo jeton me ne si një flakadan i përjetshëm.
Si shumë intelektualë dhe patriotë të mëdhenj që i humbëm në dimër, edhe Haki Rugova tani bën pjesë në vargun e tyre. Por ai nuk është vetëm, pasi është bashkuar me bashkëpunëtorët dhe miqtë e tij në këtë rresht. Vepra e tij tashmë është shenjë e pandalshme e lirisë, pavarësisë dhe demokracisë, duke u bërë një pjesë e përjetshme në historinë tonë.
Jeta e Haki Rugovës ishte jashtëzakonisht e veçantë, sepse ishte një jetë në shërbim të atdheut dhe popullit të tij. 32 vite më parë, kur okupatori fashist serb na privoi nga çdo të drejtë njerëzore dhe politike, me besimin e tij të palodhur në lirinë dhe pavarësinë e Kosovës, Haki Rugova u bashkua me grupin e intelektualëve në krye me Ibrahim Rugovën, për të kundërshtuar Milloshevicin dhe filluar kështu një rrugëtim politik që sot njihet si themeli i shtetësisë së Kosovës. Ai ishte një anëtar dhe aktivist i palodhshëm i Lidhjes Demokratike të Kosovës, dhe nuk ndaloi kurrë përpara asnjë vështirësie. Me punën dhe vullnetin e tij të palodhur, kaloi nëpër të gjitha strukturat e LDK-së, për të arritur kulmin e udhëheqjes së saj si Kryetar i Degës në Istog dhe Nënkryetar i LDK-së në nivel vendi.
E nderuar Familje e kryetarit tonë, sot, po kujtojmë prindin dhe bashkëshortin tuaj, dhe si sot e me krenari do të kujtohet përherë. Emri Haki Rugova do të jetojë gjatë e do të mbahet mend për breza dhe breza. Kjo është arsyeja pse ju duhet të ndjeheni krenar. Të ndjeheni krenar sepse keni qenë pjesë e jetës së tij dhe keni ndihmuar që emri i tij të mbetet në historinë e Kosovës.
Baci Haki, sot në këtë ditë të trishtë, të pikëlluar të kujtojmë të gjithë, por na ngushëllon fakti që tashmë je pranë shokëve që ndave jetën me ta, na ngushëllon fakti që je pranë shokëve bashkë me të cilët ndatë të njëjtin ideal.
Zoti e bekoftë Haki Rugovën dhe familjen e Tij!
