Si pasojë e temperaturave shumë të larta, në bjeshkët e Komunës së Istogut, më konkretisht në Lug të Butë, në bjeshkët e Kaliqanit dhe në bjeshkën përmbi Cërkolez, në kufi me Zubin Potokun, kanë shpërthyer zjarre me ç’rast Shtabi Komunal Emergjent menjëherë është takuar me qëllim të intervenimit dhe lokalizimit të zjarreve në këto mjedise.
Drejtori i Drejtorisë së Bujqësisë, Pylltarisë dhe Zhvillimit Rural, Januz Kabashi ka thënë se zjarr më i fuqishëm është në Lug të Butë ku atje janë dërguar Njësiti i Zjarrfikësve dhe fshatarë vullnetarë të cilët po përballen me flakët e zjarrit dhe sipas tij, është afër lokalizimit të zjarrit në këtë pjesë.
Zjarre të ngjashme janë përhapur edhe në pjesën e Zubin Potokut e që prekë edhe territorin e Komunës së Istogut. Në këtë pjesë është i angazhuar edhe KFOR-i që po ndihmojnë në shuarjen e zjarrit.
Edhe një pjesë e bjeshkës në drejtim të Kullës ka zjarr por që edhe këtu është duke u punuar për të parandaluar zgjerimin e zjarreve ku edhe këtu ka fshatarë rreth 30 sish që po angazhohen në lokalizimin e zjarrit.
“Apeloj tek qytetarët që të jenë të kujdesshëm në këto temperatura të larta sepse nga një pakujdesi mund të vije gjer tek zjarre që mund të shkaktojnë dëme të pa parashikueshme,” shprehet z. Kabashi.
